Azərbaycanın geosiyasi və strateji çəkisi daha da artmışdır
Emin Quliyev
YAP Suraxanı rayon təşkilatının fəal üzvü
Suraxanı rayonu, 79 nömrəli tam orta ümumtəhsil məktəbin müəllimi
Avropa Komissiyasının Prezidenti Ursula fon der Lyayenin Azərbaycana rəsmi səfəri Bakı ilə Brüssel arasındakı çoxşaxəli əlaqələri yeni bir pilləyə daşıyan mühüm siyasi və iqtisadi hadisə kimi qiymətləndirilir. Səfər çərçivəsində verilən bəyanatlar tərəflər arasında əməkdaşlığın daha da genişləndirilməsi, enerji təhlükəsizliyi, regional sabitlik və qarşılıqlı maraqlara əsaslanan tərəfdaşlığın inkişaf etdirilməsi baxımından xüsusi əhəmiyyət daşıyır.
Azərbaycan Prezidenti İlham Əliyev də öz bəyanatında ölkəmizin beynəlxalq enerji bazarında artan strateji roluna diqqət çəkərək Azərbaycanın Avropa üçün hər zaman etibarlı bir tərəfdaş olduğunu vurğulamışdır. Uzun illərdir Avropanın enerji arxitekturasına həlledici töhfələr verən rəsmi Bakı, Cənub Qaz Dəhlizi vasitəsilə bir sıra qoca qitə dövlətlərini fasiləsiz təbii qazla təmin edir. Son illərdə Avropada enerji təhlükəsizliyi məsələsinin misilsiz dərəcədə aktuallaşması Azərbaycanın geosiyasi və strateji çəkisini daha da artırmışdır.
Dövlət başçısı İlham Əliyev xüsusi olaraq qeyd etmişdir ki, Azərbaycan gələcəkdə də Avropaya qaz ixracının həcmini artırmağa, eyni zamanda bərpa olunan enerji mənbələrinin inkişafına xüsusi diqqət ayırmağa tam hazırdır. Bu proqressiv yanaşma Avropa İttifaqının resurs mənbələrinin şaxələndirilməsi və dayanıqlı enerji siyasəti strategiyası ilə tamamilə üst-üstə düşür. Bu baxımdan səfər zamanı yaşıl enerji sahəsində əməkdaşlıq perspektivləri də xüsusilə ön plana çıxmışdır. Azərbaycanın alternativ enerji, xüsusilə də günəş və külək enerjisi potensialı beynəlxalq miqyasda olduqca yüksək qiymətləndirilir.
Xüsusilə Xəzər dənizində irimiqyaslı külək enerjisi layihələrinin həyata keçirilməsi, ekoloji təmiz yaşıl elektrik enerjisinin birbaşa Avropa bazarlarına ixracı və beynəlxalq enerji layihələrinin genişləndirilməsi gələcək tərəfdaşlığın ən əsas hərəkətverici qüvvələrindən biri hesab olunur. Bu qlobal layihələr Azərbaycanın beynəlxalq arenada enerji ixracatçısı kimi mövqeyini daha da gücləndirməklə yanaşı, Avropa İttifaqının karbon emissiyalarının azaldılması və iqlim hədəflərinə vaxtında nail olunmasına da çox mühüm töhfələr verə bilər.
İqtisadi dividendlərlə yanaşı, Prezident İlham Əliyevin bəyanatında regional sabitlik və təhlükəsizlik məsələləri də geniş yer tutmuşdur. Bildirilmişdir ki, Azərbaycan Cənubi Qafqazda davamlı sülhün, regional dialoqun və çoxtərəfli iqtisadi əməkdaşlığın qətiyyətli tərəfdarıdır. Regionda sabitliyin köklü şəkildə möhkəmlənməsi üçün nəqliyyat-kommunikasiya layihələrinin inkişafı, region ölkələri arasında qarşılıqlı iqtisadi əlaqələrin genişləndirilməsi və yeni əməkdaşlıq platformalarının yaradılması böyük zərurət kəsb edir.
Bu kontekstdə Avropa İttifaqının regionda sabitliyə, təhlükəsizliyə və konstruktiv dialoqa verdiyi davamlı dəstək tərəflər arasında siyasi münasibətlərin və qarşılıqlı etimadın yüksələn xətlə inkişaf etməsində mühüm rol oynayır. Ursula fon der Lyayenin bu əlamətdar səfəri və Bakıda aparılan danışıqlar Azərbaycan-Aİ tərəfdaşlığının sadəcə iqtisadi mənfəətlərə deyil, həm də regional təhlükəsizliyə və qlobal çağırışlara ortaq cavab vermək iradəsinə söykəndiyini və yaxın onilliklərdə Cənubi Qafqazın geosiyasi mənzərəsini müsbət istiqamətdə dəyişəcəyini bir daha sübut edir.
