Azərbaycan qadınları müstəqillik yollarında gedən mübarizələrin də ön sıralarında idilər
Fərid Bəşirov
YAP Suraxanı rayon təşkilatının fəal üzvü
“Neftçi İdman Klubu”nun hüquq xidməti üzrə meneceri
Sivil dünya hər il 8 mart - Beynəlxalq Qadınlar Gününü qadınlara yüksək hörmət və ehtiramla qeyd edir. Bu əlamətdar təqvim ümumən dünyada gender bərabərliyinin təmini ilə bağlı mübarizənin başlanğıcı, habelə qadın hüquqlarına hörmətin yüksək nümunəsi kimi tarixləşmişdir.
Azərbaycan xalqı da tarixən özünəməxsus dəyərlərə, adət-ənənələrə bağlı olan yüksək zəkalı, nəcib və xeyirxah xanımları ilə qürur duymuş, ana adını uca tutmuş, qadına dərin hörmət və ehtiramla yanaşmışdır.
Azərbaycan qadını öz idarəsi və mərdliyi, saflığı və sədaqəti ilə cəmiyyətimizin həyatında, xalqımızın milli-mənəvi dəyərlər sisteminin formalaşdırılmasında müstəsna rol oynamışdır. Qəhrəman qadın hökmdar Nüşabə, hələ orta əsrlər dövründə qadının həyat yoldaşı seçimində azadlıq hüququnu tərənnüm etmiş Məhsəti Gəncəvi, qoca Şərqin ilk diplomat qadını Sara xatun, Şuşada ilk ədəbi məclis yaratmış Xurşudbanu Natəvan və neçə-neçə digər belə Azərbaycan qadınları ilə daim fəxr etmişik.
Dahi Nizami Gəncəvi öz əsərlərində Məhinbanu, Nüşabə, Şirin, əfsanəvi Fitnə və yeddi gözəl kimi mükəmməl obrazlar yaratmış, görkəmli memar Əcəmi Naxçıvani tərəfindən ucaldılmış Möminə xatun türbəsi əzəmətli memarlıq abidəsi olmaqla yanaşı, xalqımızın qadına göstərdiyi ehtiramın parlaq təcəssümünə çevrilmişdir.
Öz qəhrəmanlıqları ilə adlarını tariximizə yazdıran Nigar, Həcər kimi qadınlar həm də mərdlik, şücaət, qəhrəmanlıq mücəssəməsi kimi qəbul edilmiş, döyüş meydanlarında kişilərin yaxın silahdaşları, arxa-dayağı olmuşlar. Xalqımız belə qəhrəman qadınları ilə bu gün də qürur duyur, onların xatirəsini əziz tutur.
1918-ci ildə Azərbaycan Xalq Cümhuriyyətinin yaranması Azərbaycan qadınının demokratik cəmiyyətin fəal üzvünə çevrilməsi üçün geniş imkanlar yaratdı. Sovet hakimiyyəti illərində də Azərbaycan qadını çox mürəkkəb və şərəfli yol keçmişdir. Qısa bir müddətdə qadınlar arasında savadsızlığın ləğvi, qadınların müəllim, həkim, mühəndis və sair peşələrə yiyələnərək cəmiyyətdə kişilərlə bərabər hüquqlara malik olması, öz istedad və bacarıqlarını gerçəkləşdirə bilməsi həmin dövrün başlıca nailiyyətləridir.
Azərbaycan qadınları müstəqillik yollarında gedən mübarizələrin də ön sıralarında idilər. Müstəqil Azərbaycan Respublikasının 1995-ci ildə qəbul olunmuş ilk konstitusiyası qadınların kişilərlə bərabər hüququnu təsdiq etdi və demokratik dövlət quruculuğu prosesində onların fəal iştirakının hüquqi bazasını yaratdı.
Azərbaycan dövlətçiliyinin möhkəmləndirilməsi və Vətənə hədsiz sədaqəti ilə seçilən gənclərin yetişdirilməsi istiqamətində qadınlarımızın danılmaz rolu vardır. Belə ki, Azərbaycan qadını daim analıq missiyasını şərəflə həyata keçirərək gənclərin milli-vətənpərvərlik ruhunda yetişməsinə, milli-mənəvi dəyərlərə bağlı olmasına, layiqli insan və vətəndaş kimi formalaşmasına öz töhfəsini verib və bu gün də verməkdədir.
Respublikamızda qadın hərəkatının geniş vüsət almasında, xanımlarımızın nəcib və xeyirxah məqsədlər naminə sistemli və ardıcıl fəaliyyətinin genişlənməsində Azərbaycanın Birinci vitse-prezidenti Mehriban xanım Əliyevanın da xidmətləri xüsusi vurğulanmalıdır. Azərbaycan qadını üçün səciyyəvi olan humanizm, qayğıkeşlik və insanpərvərlik kimi ali mənəvi keyfiyyətlər Mehriban xanım Əliyevanın şəxsiyyətində daha parlaq təcəssümünü tapır. Onun çoxşaxəli fəaliyyəti milli-mənəvi dəyərlərə söykənən və intellektual yüksəlişə xidmət edən ideyaların cəmiyyətdə daha da zənginləşməsinə və möhkəmlənməsinə yönəlmişdir.
Bu gün Azərbaycan qadınının həm ailədə, həm işdə, həm də cəmiyyyətdəki layiqli mövqeyi dövlətimizin uğurlu, xoşbəxt sabahına, xalqımızın firavanlığına ən ciddi təminatlardan biridir.
Qarşıdan gələn 8 Mart - Beynəlxalq Qadınlar Günü münasibətilə hər bir Azərbaycan qadınını səmimi-qəlbdən təbrik edir, onlara cansağlığı xoşbəxtlik və vətənimizin işıqlı sabahı naminə fəaliyyətlərində uğurlar arzulayıram.
