Azərbaycan Ordusu döyüş meydanında öz gücünü dəfələrlə sübut etmişdir
Vaqif Qaraqoyunlu
YAP Suraxanı rayon təşkilatının ƏPT-nin sədr müavini, hərbi ekspert
Hər bir müstəqil dövlətin əsas dayaqlarından biri onun güclü və peşəkar ordusudur. Azərbaycan Respublikasında bu həqiqət xüsusi əhəmiyyət daşıyır və bu baxımdan 26 İyun – Silahlı Qüvvələrin Yaranması Günü xalqımız üçün qürur və iftixar günüdür. Bu gün, ölkəmizin müdafiə qabiliyyətinin əsasını təşkil edən ordunun qurulması və inkişaf yolunun başlanğıc nöqtəsidir.
Azərbaycan Xalq Cümhuriyyəti 1918-ci ilin 26 iyununda özünün ilk nizami hərbi birləşməsini – Azərbaycan Milli Ordusunu yaratdı. Bu addım, yeni yaranmış dövlətin müstəqilliyini qorumaq və daxili sabitliyi təmin etmək məqsədi daşıyırdı. General Səməd bəy Mehmandarov və General Əliağa Şıxlinski kimi görkəmli hərb xadimləri həmin dövrün hərbi strukturunun qurulmasında mühüm rol oynadılar.
Sovetlər dönəmində ordu ideyası sıxışdırılsa da, 1991-ci ildə Azərbaycanın dövlət müstəqilliyinin bərpası ilə Silahlı Qüvvələrimizin yenidən formalaşdırılması prosesi başladı. 1992-ci ildə ümummilli lider Heydər Əliyevin fərmanı ilə 26 iyun – Silahlı Qüvvələr Günü kimi rəsmiləşdirildi, bu isə dövlətçiliyimizin davamlılığının təzahürü idi.
Azərbaycan Ordusu təkcə kağız üzərində deyil, döyüş meydanında öz gücünü dəfələrlə sübut etmişdir. Xüsusilə 2020-ci ildə Vətən müharibəsində – 44 günlük müharibədə əldə edilən şanlı Qələbə xalq-ordu birliyinin, peşəkarlığın, müasir texnologiyaların tətbiqinin və Ali Baş Komandanın qətiyyətli rəhbərliyinin parlaq nümunəsi oldu. Bu zəfər ordumuzun regionun ən güclü ordularından biri olduğunu bir daha təsdiqlədi.
Hazırda Silahlı Qüvvələrimiz NATO standartlarına cavab verən, yüksək döyüş hazırlığına malik, texnoloji baxımdan müasir silahlarla təchiz edilmiş peşəkar hərbi quruma çevrilib. Hərbi təhsil sahəsində islahatlar, Türkiyə ilə hərbi əməkdaşlıq, yeni hərbi hissələrin yaradılması, şəxsi heyətin sosial təminatının yaxşılaşdırılması – bütün bunlar güclü ordu quruculuğunun tərkib hissəsidir.
26 İyun təkcə Silahlı Qüvvələrin yaranma tarixi deyil, bu həm də Vətənə, müstəqilliyə, dövlətçiliyə sədaqətin, qorxmazlığın və fədakarlığın simvoludur. Bu gün biz ordumuzla fəxr edir, onun uğurlarını alqışlayır və gələcək nəsillərə güclü dövlətin varisi olma məsuliyyətini ötürürük. Şəhidlərimizin ruhu qarşısında baş əyir, qazilərimizə və hərbi qulluqçularımıza dərin ehtiramımızı bildiririk.
Yaşasın Azərbaycan!
Yaşasın Müzəffər Ali Baş Komandan!
Yaşasın Rəşadətli Azərbaycan Ordusu!
