Xəyalə Veyisova

YAP Suraxanı rayon təşkilatının ƏPT-nin sədri
Xarici dillər təmayüllü gimnaziyanın direktoru

Şərqin qaranlıq üfüqlərində bir günəş kimi doğan Azərbaycan Xalq Cümhuriyyəti, millətimizin azadlıq eşqinin, sarsılmaz iradəsinin və dövlətçilik dühasının ən uca zirvəsidir.

Azərbaycan xalqının çoxəsrlik tarixində elə günlər var ki, onlar sadəcə bir xronologiya deyil, millətin ruhunun yenidən doğulduğu, öz taleyini öz əlinə aldığı müqəddəs anlardır. 1918-ci ilin 28 may günü məhz bütöv bir millət üçün belə bir tarixi gündür.

Müsəlman Şərqində ilk demokratik, hüquqi və dünyəvi parlament respublikasının məhz Azərbaycan torpağında ucaldılması, xalqımızın XIX əsr və XX əsrin əvvəllərində keçdiyi böyük intibah və milli oyanış yolunun məntiqi nəticəsi idi. Bu tarixi zəfərin fəlsəfəsində milli azadlıq ideyalarını xalqın qəlbinə nəqş edən böyük mütəfəkkirlərin, millət fədailərinin və ziyalıların unudulmaz əməyi dayanır.

Azərbaycan Xalq Cümhuriyyətinin qurulması və İstiqlal Bəyannaməsinin elan edilməsi, cümhuriyyət qurucularının adı ilə bağlıdır. Bu cəsur hərəkat, Şərq dünyasında demokratiyanın, parlamentarizmin və insan hüquqlarına hörmətin ilk fundamental təməl daşı oldu. Cümhuriyyət cəmi 23 ay yaşasa da, xalqın qan yaddaşına elə bir müstəqillik toxumu əkdi ki, o toxum onilliklər keçsə də, sovet imperiyasının qanlı repressiyalarına tab gətirərək məhv olmadı.

XX əsrin sonlarında xalqımız yenidən öz tarixi müstəqilliyinə qovuşarkən bu əbədi irsi qorumaq və yaşatmaq missiyası Ulu Öndər Heydər Əliyevin çiyinlərinə düşdü. Siyasi iradəsi, xilaskar dühası və fədakarlığı ilə Azərbaycan dövlətçiliyini yox olmaq təhlükəsindən qurtaran Ümummilli Lider, cümhuriyyətin tarixi rolunu hər zaman ən ali səviyyədə qiymətləndirmişdir.

Heydər Əliyev vurğulayırdı ki, müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifədir. Məhz onun uzaqgörən siyasəti və fədakarlığı sayəsində cümhuriyyətin tarixi irsi yenidən dövlətimizin təməlinə çevrildi, 28 May günü dövlət səviyyəsində müqəddəs bir bayram kimi təsbit olundu.

Rusiya imperiyasının süqutundan sonra yaranan mürəkkəb geosiyasi şəraitdə Azərbaycan ziyalılarının nümayiş etdirdiyi diplomatik çeviklik və hərbi rəşadət bugünkü dövlətimizin sütunlarını təşkil edir. Azərbaycan Respublikasının Prezidenti İlham Əliyevin qeyd etdiyi kimi, müsəlman aləmində ilk demokratik respublikanın məhz bizim xalqımız tərəfindən yaradılması hər bir azərbaycanlı üçün sonsuz qürur mənbəyidir. Cümhuriyyət bizə yalnız müstəqillik təcrübəsi deyil, həm də çoxşaxəli diplomatik əlaqələr və beynəlxalq hüququn subyekti olmaq ənənəsini miras qoymuşdur.

Bu gün Heydər Əliyevin qoruduğu və Prezident İlham Əliyevin rəhbərliyi ilə Şanlı Ordumuzun işğaldan azad etdiyi torpaqlarda ucaltdığı üçrəngli bayrağımız tamamilə yeni bir əzəmətlə dalğalanır. Azərbaycanın səmada quş tək süzən bayrağı, Qarabağda, Şuşada, Xankəndidə bərqərar olan suverenliyimiz Cümhuriyyət qurucularının ruhuna ən böyük töhfə, gələcək nəsillərə isə unudulmaz bir dövlətçilik əmanətidir. 28 May artıq torpaqları bütövləşmiş, zəfər qazanmış müqəddəs və bütöv bir millətin tarixi bayramıdır.

MÜSTƏQİLLİYİMİZ DAİMİDİR, ƏBƏDİDİR, DÖNMƏZDİR!