25 Noyabr – Kəlbəcər Şəhəri Günü: Tarixi Əhəmiyyət, İşğaldan Azadlıq və Böyük Qayıdış Strategiyası
Anaxanım Vəliyeva
YAP Suraxanı rayon təşkilatının üzvü
Suraxanı rayonu, 146 nömrəli tam orta məktəbin müəllimi
Kəlbəcərin işğaldan azad edilməsi və sürətli bərpası Azərbaycan Respublikasının Prezidenti, Müzəffər Ali Baş Komandan cənab İlham Əliyevin uzaqgörən və qətiyyətli siyasətinin nəticəsidir.
Bu strategiya iqtisadi müstəqilliyin təmin edilməsi, müasir ordu quruculuğu və beynəlxalq arenada Azərbaycanın ərazi bütövlüyü ilə bağlı ədalətli mövqeyinin formalaşdırılmasını əhatə edirdi. 44 günlük Vətən müharibəsi dövründə Ali Baş Komandanın dəqiq hərbi planlaması və prinsipial diplomatik manevrləri sayəsində döyüş meydanında əldə edilən parlaq Zəfər, siyasi müstəvidə də təsdiqini tapdı.
Kəlbəcərin işğaldan azad edilməsi prosesi, bütövlükdə isə Vətən müharibəsindəki Zəfər şəhidlərimizin qanı və qazilərimizin şücaəti bahasına qazanılmışdır. Azərbaycanın igid oğulları və qızları Ali Baş Komandanın əmri ilə düşmən üzərinə gedərək, misilsiz qəhrəmanlıq, fədakarlıq və vətənpərvərlik nümayiş etdirmişlər. Onların sarsılmaz iradəsi və cəsarəti 30 illik işğala son qoydu.
Kəlbəcərin bu günü Ümummilli Lider Heydər Əliyevin təməlini qoyduğu müstəqil dövlətçilik və güclü ordu quruculuğu siyasətinin məntiqi davamıdır. Hələ Sovet dövründə Ulu Öndər Kəlbəcərin əhalisinin köçürülməsi ilə bağlı məkrli təşəbbüslərin qarşısını almış, rayonun inkişafı üçün mühüm addımlar atmışdır. Onun dövlətçilik irsi bu gün cənab Prezident İlham Əliyev tərəfindən uğurla davam etdirilərək tarixi Qələbəyə çevrilmişdir. Nəticədə, Kəlbəcər bir güllə atılmadan, Üçtərəfli Bəyanat əsasında Azərbaycana qaytarıldı.
Azərbaycanın Birinci vitse-prezidenti Mehriban Əliyeva isə cənab Prezidentlə birlikdə Kəlbəcər rayonuna səfərlər edərək, "İstisu" Müalicə-İstirahət Kompleksinin tikintisi, infrastruktur layihələri və məskunlaşma işləri ilə yaxından tanış olmuşdur. Onun rəhbərlik etdiyi Heydər Əliyev Fondunun fəaliyyəti, xüsusən də tarixi-mədəni irsin bərpası və şəhid ailələrinə, qazilərə dəstək sahəsindəki layihələri Kəlbəcərin yenidən həyata qayıtmasında mühüm rol oynayır.
Azad olunmuş ərazilərə Böyük Qayıdışın təmin edilməsi cənab Prezidentin şəxsi nəzarətindədir. O, 2021-ci ildən bu günə qədər Kəlbəcərə dəfələrlə səfər edərək, "Murovdağ" tunelinin, yolların, elektrik stansiyalarının, "İstisu" zavodunun və yaşayış komplekslərinin təməlqoyma və açılış mərasimlərində iştirak etmişdir. Bu, dövlət başçısının regionun bərpasına verdiyi yüksək əhəmiyyətin göstəricisidir.
