Ən "Şirin Dil" – Azərbaycan Dili
Zeynəb Əlizadə
YAP Suraxanı rayon təşkilatının fəal üzvü
Suraxanı rayonu, 281 nömrəli tam orta məktəbin əməkdaşı
Bəzən bir mahnı insanın qəlbində sözlərin belə aciz qaldığı gizli, ülvi hissləri oyadır. Xalq artisti Emin Sabitoğlunun "Şirin dil" nəğməsini dinləyərkən insan bir daha dərk edir ki, ana dili sadəcə bir ünsiyyət vasitəsi deyil. O, bir xalqın döyünən ürəyi, tarixin dərinliklərindən süzülüb gələn ruhu, mədəniyyət yaddaşı və milli kimliyidir. Bu ecazkar nəğmə doğma dilimizə olan sonsuz sevgi və bağlılığın musiqiyə çevrilmiş ən zərif ifadəsidir.
Məhz bu müqəddəs sevginin təzahürü olaraq, hər il avqust ayının ilk günü ölkəmizdə "Azərbaycan Əlifbası və Azərbaycan Dili Günü" kimi böyük bir ehtiramla qeyd olunur. Azərbaycan dili əsrlər boyu tarixin amansız fırtınalarından keçərək xalqımızın milli varlığını bir sipər kimi qorumuş, zəngin ədəbiyyatımızın, solmaz mədəniyyətimizin və mənəvi dəyərlərimizin işığını bu günümüzə daşımışdır.
Ulu Öndər Heydər Əliyev Azərbaycan dilini dövlətçiliyimizin sarsılmaz təməli, müqəddəs sütunu hesab edirdi. Onun sarsılmaz qətiyyəti və uzaqgörən siyasəti sayəsində, hələ 1978-ci ildə Azərbaycan dili Konstitusiyada öz layiqli yerini alaraq dövlət dili statusuna ucaldı. Müstəqilliyimizin nurlu illərində bu ulu siyasət daha da çiçəkləndi; 1995-ci ilin Əsas Qanununda ana dilimizin toxunulmazlığı təsbit edildi, onun qorunması və inkişafı üçün tarixi fərmanlar imzalandı.
Bu gün isə Prezident İlham Əliyevin rəhbərliyi altında ana dilimizin saflığının qorunması, onun rəqəmsal dünyanın sonsuz üfüqlərində geniş dalğalanması və gələcək nəsillərə bir büllur kimi saf ötürülməsi istiqamətində möhtəşəm addımlar atılır. Çünki ana dilini qorumaq – namusu, qeyrəti, milli kimliyi və müstəqil dövlətçiliyi qorumaq deməkdir.
Ulu Öndərin ruhumuza həkk olunan o dahi kəlamı hər birimiz üçün mayakdır: "Xalqı xalq edən, milləti millət edən onun ana dilidir." Bu müqəddəs nidanı rəhbər tutaraq, hər birimiz dilimizi canımız tək sevməli, onun incəliklərini öyrənməli və gündəlik həyatımızda bir ana nəfəsi kimi qorumalıyıq. Axı Azərbaycan dili bizim təkcə danışdığımız dil deyil; o, qəlbimizin ən kövrək səsi, milli qürurumuzun göylərə ucalan fəryadı və zəfər sədasıdır!
