“Qan yaddaşımız” adlı dəyirmi masa təşkil olunmuşdur
26 fevral 2025-ci il tarixində YAP Suraxanı rayon təşkilatının və Suraxanı rayonu, 87 nömrəli tam orta məktəbin birgə təqdimatında Xocalı faciəsinin 33-cü ildönümə həsr olunmuş dəyirmi masa təşkil olunub. Dəyirmi masa qarşılıqlı diskussiya formatında baş tutmuş, Xocalı faciəsinə həsr olunmuş video-çarx izlənilmişdir.
Tədbirdə YAP Suraxanı rayon təşkilatının məsləhətçisi Kürsüm Həsənova, Suraxanı rayonu, 87 nömrəli tam orta məktəbin direktor əvəzi Kəmalə İbrahimova, tarix müəllimləri Abdullayeva Elnurə, İbrahimova Afət və bir qrup şagird iştirak etmişlər.
Suraxanı rayonu, 87 nömrəli tam orta məktəbin direktor əvəzi Kəmalə İbrahimova tədbiri açıq elan edərək dedi ki, Bəzən tarix qara hərflərlə yazılır. Bəzən insanlıq unudulur, bəşəriyyətin mənəvi sərhədləri aşılır və vicdanlar susur. 1992-ci il fevralın 26-na keçən gecə Xocalıda baş verənlər, yalnız bir xalqın yox, bütün insanlığın yaddaşına həkk olunmuş bir faciədir. Həmin gecə Xocalı, yalnız alova bürünən evlərin deyil, dağılan talelərin, puç olan ümidlərin şəhərinə çevrildi.
Tarix müəllimləri Abdullayeva Elnurə, İbrahimova Afət çıxış edərək xocalı soyqırımı haqqında ətralı məlumat verərək dediklər ki, o qış gecəsində qarın üstünə yalnız qanın qızılı rəngi düşdü. Qoca, qadın, uşaq demədən qətlə yetirilən 613 nəfərin hər biri bir ömrün, bir hekayənin, bir sevdanın sonu oldu. Körpə gözlər qorxunun, soyuğun və ölümün içində dondu. 63 uşaq, 106 qadın, 70 nəfər yaşlı insan bu dəhşətin qurbanı oldu. 8 ailə tamamilə məhv edildi, yüzlərlə insanın həyatı bir anın içində kabusa döndü.
Çıxış edən şagirdlər də öz növbələrində mövzu ilə bağlı etdikləri araşdırmaları dəyirmi masa iştirakçılarının diqqətinə çatdırdılar.
Sonda çıxış edən YAP Suraxanı rayon təşkilatının məsləhətçisi Kürsüm Həsənova məktəb kollektivinə Xocalı faciəsinə həsr olunmuş maarifləndirici görüşün təşkilinə görə öz dərin minnətdarlığını bildirdi. Kürsüm Həsənova onu da vurğuladı ki, Xocalı şəhidlərinin qanı yerdə qalmadı. Müzəffər Ali Baş Komandan cənab Ilham Əliyevin rəhbərliyi ilə rəşadətli ordumuz tərəfindən günahsız qurbanların qisasları döyüş meydanında qəhrəmancasına alınmışdır.
