Prezident İlham Əliyevin Budapeştdə verdiyi mühüm bəyanatlar
Nigar Qasımzadə
YAP Suraxanı rayon təşkilatının üzvü
Suraxanı rayonu, 76 nömrəli tam orta məktəbin
Azərbaycan Respublikasının Prezidenti İlham Əliyevin 2025-ci ilin may ayında Macarıstana işgüzar səfəri iki ölkə arasında strateji tərəfdaşlığın yeni mərhələyə qədəm qoyduğunu təsdiqlədi. Səfər çərçivəsində keçirilən yüksək səviyyəli görüşlər, imzalanan sənədlər və verilən bəyanatlar göstərdi ki, Azərbaycan və Macarıstan münasibətləri artıq yalnız diplomatik çərçivədə deyil, iqtisadi, enerji, nəqliyyat, kənd təsərrüfatı və humanitar sahələri də əhatə edən geniş spektrli əməkdaşlıq formatına keçib.
Prezident İlham Əliyev və Macarıstanın Baş naziri Viktor Orban arasında keçirilən təkbətək və geniş tərkibdə görüşlər zamanı iki ölkə arasında əməkdaşlığın hazırkı səviyyəsi yüksək qiymətləndirildi və gələcək üçün konkret addımlar müəyyən edildi. Prezident Əliyev mətbuata verdiyi bəyanatda vurğuladı ki, Azərbaycan və Macarıstan arasında münasibətlər təkcə siyasi sahədə deyil, iqtisadi və mədəni müstəvidə də dinamik şəkildə inkişaf edir. O, Macarıstanı Azərbaycanın etibarlı tərəfdaşı və Avropada səmimi dost ölkə kimi xarakterizə etdi.
Əsas müzakirə mövzularından biri enerji sahəsində əməkdaşlıq oldu. Prezident İlham Əliyev Azərbaycanın Avropanın enerji təhlükəsizliyinə töhfə verən mühüm ölkələrdən biri olduğunu qeyd edərək, Macarıstanın bu prosesdə həm istehlakçı, həm də tranzit ölkə kimi əhəmiyyətli rol oynayacağını bildirdi. Azərbaycan qazının Bolqarıstan və Rumıniya vasitəsilə Macarıstana çatdırılması istiqamətində atılan addımların önəmi xüsusi vurğulandı. Bununla yanaşı, bərpaolunan enerji sahəsində də birgə layihələrin həyata keçirilməsi imkanları müzakirə olundu.
Nəqliyyat sahəsində əməkdaşlıq perspektivləri də diqqət mərkəzində oldu. Prezident Əliyev bildirdi ki, artıq Azərbaycan və Macarıstan arasında dəmir yolu ilə yük daşımaları başlayıb və bu, Şərq-Qərb nəqliyyat dəhlizinin bir hissəsi kimi iki ölkə arasında ticarətin inkişafına xidmət edəcək. Azərbaycanın beynəlxalq logistika mərkəzinə çevrilməsi istiqamətində atdığı addımlar Macarıstan tərəfindən də yüksək qiymətləndirildi.
Səfər çərçivəsində tərəflər arasında bir sıra mühüm sənədlər imzalandı. Onların sırasında enerji sahəsində əməkdaşlıq haqqında Anlaşma Memorandumu, kənd təsərrüfatı, miqrasiya, qida təhlükəsizliyi və kosmos sahəsində əməkdaşlığa dair sənədlər də yer aldı. Bu sənədlər təkcə siyasi bəyannamə xarakteri daşımır, həm də qarşılıqlı iqtisadi layihələrin reallaşmasına zəmin yaradır.
Təhsil və mədəniyyət sahələri də əməkdaşlığın mühüm tərkib hissəsidir. Prezident İlham Əliyev Macarıstan hökumətinin Azərbaycanlı tələbələrə ayırdığı təqaüdləri yüksək qiymətləndirərək bildirdi ki, hazırda 200-dən çox Azərbaycan gənci Macarıstanın ali təhsil müəssisələrində təhsil alır. Bu, yalnız təhsil sahəsində deyil, iki xalq arasında dostluğun möhkəmlənməsinə də xidmət edir.
Sonda Prezident İlham Əliyev Macarıstanın Baş naziri Viktor Orbanı Azərbaycana rəsmi səfərə dəvət etdi. Bu dəvət Orban tərəfindən minnətdarlıqla qəbul olundu və yaxın gələcəkdə həyata keçiriləcək qarşılıqlı səfərlərin münasibətlərə əlavə dinamizm verəcəyi qeyd edildi.
